चेस- श्रीधर तिळवे

जागताना तू मला स्वप्न दाखवतोस
झोपेत तू मला जग दाखवतोस
स्वप्नात मला जागृतीची स्वप्ने पडतात

हे तू माझ्याशी कसले खेळ खेळतोयस ?

चेसच खेळायचे तर
कॉरपॉव्हशी खेळ

ज्याला बुद्धिबळातले बु ही येत नाही
त्याला तुझ्या बळाचे भय वाटेल नाहीतर काय ?

सगळ्या सोंगट्या मिटवून टाक
आणि कायमचे देता येत नसेल तर
आणि कर्जाऊच देता येणार असेल तर निर्वाणच दे

मलाही कळू दे
हा जागृतीतला खेळखंडोबा

-श्रीधर तिळवे