मी फूल तृणातील इवले- मंगेश पाडगावकर

जरी तुझिया सामर्थ्याने
ढळतील दिशाही दाही
मी फूल तृणातील इवले
उमलणार तरीही नाही..


शक्तिने तुझिया दिपुनी
तुज करतील सारे मुजरे
पण सांग कसे उमलावे
ओठातिल गाणे हसरे ?


जिंकिल मला दवबिंदू
जिंकिल तृणाचे पाते
अन स्वत:स विसरुनी वारा
जोडील रेशमी नाते..


कुरवाळीत येतील मजला
श्रावणा्तील जलधारा
सळसळून भिजली पाने
मज करतील सजल इशारा..


रे तुझिया सामर्थ्याने
मी कसे मला विसरावे?
अन रंगांचे गंधांचे
मी गीत कसे गुंफ़ावे?


शोधित धुक्यातून मजला
दवबिंदू होवुनी ये तू
कधी भिजलेल्या मातीत
मृदु सजल सुगन्धित हो तू !


तू मलाच विसरुनी यावे
मी तुझ्यात मज विसरावे..
तू हसत मला फूलवावे
मी नकळत आणि फ़ुलावे..

- मंगेश पाडगावकर