पांढ-या शुभ्र हत्तींचा
रानांतून कळप निघाला;
संपूर्ण गर्द शोकाच्या
झाडांतहि मिसळून गेला.
त्या गूढ उतरत्या मशिदी
पक्ष्यांनी गजबजलेल्या;
कल्लोळ पिसांचा उडता
आभाळ लपेटुन बुडल्या.
पांढ-या शुभ्र हत्तींनी
मग डोंगर उचलून धरले;
अन तसे काळजाखाली
अस्थींचे झुंबर फुटलें …
मावळता रंग पिसाट
भयभीत उधळली हरिणें;
मुद्रेवर अटळ कुणाच्या
अश्रूत उतरलीं किरणे.
पांढरे शुभ्र हत्ती मग
अंधारबनांतून गेले;
ते जिथे थांबले होते
ते वृक्ष पांढरे झाले...
-ग्रेस
No comments:
Post a Comment